Finalja e ”Conference League” në Tiranë, Brataj tregon skemën sesi do të funksionojë shërbimi mjekësor

E gjithë Shqipëria është në përgatitje për të pritur finalen e ”Conference League”, që do të luhet në stadiumin ”Arena Kombëtare”. Kreu i urgjencës Kombëtare, Skënder Brataj tregon skemën se si do të funksionojë shërbimi mjekësor brenda stadiumit. 7 qendra shëndetësore dhe 40 punonjës të Urgjencës do të jenë përreth fushës dhe në tribunë gjatë kohës që do të luhet ndeshja Roma-Feyenoord.

Për çdo incident të mundshëm gjatë dhe pas ndeshjes, Urgjenca Kombëtare ka planifikuar që edhe trajtimi spitalor i tifozëve të bëhet në spitale të ndryshme. Urgjenca e spitalit “Shefqet Ndroqi” do të jetë në gatishmëri për tifozët holandezë, ndërsa Spitali i Traumës është planifikuar të presë tifozët e Romës për çdo problem apo përplasje të mundshme me tifozerinë kundërshtare.

Në bashkëpunim me Policinë e Shtetit, Urgjenca do të shtrihet nga Rinasi, në rrugët e Tiranës, ku do të vendosen monitorë për të ndjekur ndeshjen dhe veçanërisht në zonën përreth stadiumit.