”Fiskalizimi”, diskutimi me grupet e interesit deri në 15 shtator

Bizneset dhe grupet e interesit do të kenë më shumë kohë në dispozicion, që të njihen dhe të bëjnë sugjerimet e tyre, në lidhje me projektligjin e ri për ”Fiskalizimin”, i parashikuar që më 30 gusht 2019, të mbyllte fazën e diskutimeve dhe të konsultimeve me aktorët e fushës.

Gjatë takimit të fundit që zhvilloi me bizneset, Ministrja e Financave dhe Ekonomisë, Anila Denaj u shpreh se bizneset e vogla do të kenë një aplikacion falas si një mënyrë për të mos i rënduar ata në momentin e hyrjes në fuqi të faturës elektronike. Ndërsa shtoi se afati për konsultimin e projektit të ri do të shtyhet me dy javë deri më 15 shtator.

Sipas Denajt, vënia në funksion e këtij sistemi do të rrisë transparencën e transaksioneve. Projektligji për “Fiskalizimin” që parashikon faturat online, elektronike pritet të hyjnë në fuqi në janar të vitit të ardhshëm.