Fluks ambulancash te spitali Infektiv, shtohet sigura në hyrje

Muaji nëntor po rezulton i egër sa i takon shifrave ditore për pandeminë e Covid-19. Pothuajse çdo ditë ka mbi 7 viktima dhe afro 500 raste të reja me Covid-19. Me rritjen e rasteve të Covid-19 është rritur edhe fluksi në spitalin Infektiv. Deri në këto momente në spitalin e Infektimit janë rreth 10 ambulanca, disa prej të cilave kanë sjellë pacientë e disa presin ti marrin. Ndërkaq është shtuar edhe siguria në hyrje të spitalit.

Tensioni përfshiu edhe stafin mjekësor, tonet e larta të të cilëve u dëgjuan deri jashtë zonës së rrethimit. Të tjerë qytetarë presin prej ditësh përpara spitalit Covid 1 për të mësuar rreth gjendjes së familjarëve që kanë të shtruar aty.

“E çuam në Berat, na nisën për në Tiranë. Që kur e prumë këtu nuk dimë asgjë. Nuk shohim asnjë mjek e asnjë infermier”. “Kam djalin, e kam sjellë që në orën 2:00 të natës dhe nuk kam marrë vesh gjë. I thashë 1 polici aman shko merr vesh ça u bë me djalin, a është bërë më mirë apo më keq”. Numri i lartë i infektimeve ditore ka sjellë edhe fluks të rasteve urgjente që i drejtohen spitalit Covid 1. Në të tre spitalet janë mbi 350 pacientë që po trajtohen, duke çuar drejt ezaurimit të kapaciteteve në dispozicion.