Fluks i lartë udhëtarësh në Morinë, Kosova heq masat

Kalimi i shtetasve shqiptarë drejt Kosovës i është rikthyer normalitetit mëngjesin e kësaj të hëne. Autoritetet e Kosovës kanë hequr masat që mbajtën për një javë, siç ishte certifikata mjekësore që tregonte negativitetin ndaj Covid-19 ose karantinimi 7-ditor.

Në kufi tashmë kontrollohet vetëm temperatura dhe mbahen shënim të dhënat e udhëtarëve dhe vendin ku po shkojnë. Fluksi i lartë i qytetarëve të Shqipërisë për të hyrë në Kosovë ka bërë që të krijohen radhë të gjata, nga persona që shkonin drejt Kosovës.

Për të parë nga afër situatën, në pikën e kalimit kufitar Shqipëri-Kosovë ishte edhe ministri i Shëndetësisë së Kosovës Armend Zemaj, i cili ka apeluar për respektim të masave dhe këshillave nga autoritet shëndetësore. Ministri i Shëndetësisë së Kosovës ka shpërndarë edhe maska për shtetasit shqiptarë që futeshin në Kosovë.