FOTO-Ja si do të duket Pazari i Ri në Tiranë

“Mirëmëngjes Pazari i Ri! Nisim projektin në tetor për ta kthyer nga një skutë, në zonën më atraktive. Do të jetë një nga projektet më të bukura të Tiranës dhe një hapësirë e re turistike për qytetin”.

Kështu shkruan të enjten kryebashkiaku Erion Veliaj, duke postuar disa foto nga projekti.

Një ditë më parë Veliaj njoftoi se është duke u diskutuar gjetja e një zgjidhje efiçente për trafikun dhe ndërtimin e një sheshi me kalldrëm ose pllaka.

“Gjithashtu, do të marrim një vendim për të gjitha godinat që rrethojnë tregun. Do të kemi edhe një pastrim të rrugës “Qemal Stafa”, e cila do të rinovohet për t’u bërë pjesë e kompleksit të Pazarit të Ri”, sqaroi Veliaj.

“Sot Tirana vuan për atraksione tipike vendase. Ndaj, në pjesën e dytë të ditës, tregu i Pazarit të Ri do të jetë një hapësirë rikrijuese, me ushqime tradicionale dhe dyqane artizanësh. Aktualisht, gjatë pasdites tregu rri bosh dhe është komplet jashtë funksionit”,nënvizoi kryetari i Bashkisë së Tiranës. Veliaj theksoi se në gjendjen ku ndodhet sot tregu nuk e mban dot veten financiarisht, por as nuk është një pjesë e këndshme e Tiranës.