Pas vizitës zyrtare në Korenë e Jugut, kryeministri Edi Rama ka mbërritur në Japoni, në kuadër të një turi diplomatik në Azi që synon forcimin e marrëdhënieve dypalëshe dhe zgjerimin e bashkëpunimit ekonomik, politik dhe kulturor.
Rama dhe delegacioni shqiptar është pritur në Tokio me simbolet e dy vendeve, flamurin kuqezi dhe atë japonez. Vizita zyrtare në Japoni pritet të zgjasë deri më 23 maj dhe përfshin një sërë takimesh me përfaqësues të lartë të qeverisë japoneze, institucione ekonomike dhe potencialisht përfaqësues të sektorit të biznesit dhe teknologjisë.
Fokus kryesor i bisedimeve pritet të jetë rritja e investimeve japoneze në Shqipëri, bashkëpunimi në infrastrukturë, energji, digjitalizim dhe turizëm, si dhe forcimi i shkëmbimeve kulturore dhe arsimore. Ky takim vjen në një moment kur Shqipëria po kërkon të zgjerojë praninë e saj diplomatike dhe ekonomike në Azi, duke e parë Japoninë si një partner strategjik me ndikim të madh në teknologji, inovacion dhe financa ndërkombëtare.
