Fotot/ Qendër moderne logjistike në Kosovë, investimi i fundit i Balfin

Faruk Ademi

Grupi Balfin ka vënë në jetë një tjetër projekt të rëndësishëm në Kosovë.Është realizuar së fundmi një Qendër e re Logjistike në periferi të Prishtinës, një investim që prek vlerën e 5 milionë eurove, ku një sipërfaqe prej rreth 15 mijë metrash katrorë, do të shërbejë si qendra e re logjistike e kompanive Jumbo, Neptun, dhe Elektroservis, si dhe për në zyrat e këtyre dy të fundit.
“Një qendër logjistike me një sistem menaxhimi efektiv të inventarit ka ndikim dhe në vendimin e blerjeve, duke ofruar të dhëna të sakta për hapësirën e disponueshme dhe mundësinë e magazinimit të stokut. Prandaj, ndërtimi i kësaj qendre logjistike, me këtë lloj infrastrukture, ku monitorimi i procesit të punës është më i lehtë, rrit sigurinë e investimit të bërë. Ndërkaq, referuar mjediseve të reja të punës, e konsideroj si një investim në efikasitetin e punës së përditshme dhe motivimin e stafit, pasi një ambient i këndshëm sjell çdo herë rendiment më të lartë” – u shpreh Drejtori Ekzekutiv i Neptun Kosovës, Faruk Ademi, për investimin më të fundit të Grupit Balfin.
Ndërtimi i kësaj qendre logjistike me një infrastrukturë me standarde të larta, ka optimizuar sistemin e punës duke rritur kështu efikasitetin e menaxhimit të zinxhirit të dërgesave, krijimin e kushteve më të mira të punës gjatë procesit të ngarkim-shkarkimit, ambiente më të përshtatshme për punonjësit, qasje dhe monitorim më i lehtë i stokut.
Në qendrën logjistike, administratën e saj dhe kompanitë që e përbëjnë, pritet që gjatë vitit të ardhshëm të punësohen rreth 100 punonjës të rinj. Ndërkohë që Grupi Balfin ka të punësuar 1310 punonjës në të gjitha kompanitë e tij në Kosovë.
Grupi nuk është i pranishëm vetëm në sektorin e ri-shitjes së autorizuar me pakicë të produkteve elektro-shtëpiake, pasi prej disa vitesh administron edhe një ndër kompanitë më të mëdha në Kosovë, Newco Ferronikelin, i cili është padyshim edhe kompania më e madhe eksportuese në vend. Me këtë industri lidhen edhe 2 mijë vende punë indirekte, përveç të punësuarve të vetë fabrikës.
Në kuadër të fokusit të ri të Grupit, i cili po e shton gjithnjë e më tepër vëmendjen në investimet në rajonin e Ballkanit dhe më gjerë, pasi është mjaft i konsoliduar në tregun shqiptar, duhet parë dhe investimi më i fundit në Kosovë, dhe ai i pak muajve më parë në Maqedoninë e Veriut, ku u lëvrua kredia më e madhe në historinë bankare të këtij shteti, për ndërtimin e qendrës tregtare që do të ndodhet brenda kompleksit më të ri dhe modern që po ndërtohet nga Balfin në zemër të Shkupit, Skopje East Gate dhe që pritet t’i çelë dyert brenda 2021-shit.
Balkan Finance Investment Group, BALFIN Group, është një nga grupet investuese më të rëndësishme dhe më të suksesshme në rajonin e Ballkanit Perëndimor.
Gjeografikisht, Grupi BALFIN është i pranishëm në Austri, Shqipëri, Kosovë, Bosnjë dhe Hercegovinë, Maqedoni Veriore, Mali i Zi dhe Holandë, me afërsisht 6’000 punonjës në total.
Aktivitetet e Grupit BALFIN përfshijnë zhvillimin dhe menaxhimin e pasurive të patundshme, shitjet me pakicë, industrinë minerare, sistemin bankar, turizmin, energjinë, logjistikën, etj.
Grupi BALFIN po rritet në mënyrë të qëndrueshme dhe kontribuon në përmirësimin e jetesës së komuniteteve përmes zhvillimit ekonomik, prezantimit të ideve të reja, punësimit dhe investimeve sociale.