Frontex në Shqipëri, jehonë në median ndërkombëtare

Emigrantët e jashtëligjshëm që shfrytëzojnë kufirin e gjelbër shqiptaro-grek, duhet të mendohen dy herë për të ndërmarrin një veprim të tillë. Duke nisur nga sot, i gjithë kufiri do të monitorohet nga 50 oficerë të Frontex . Objektiv është kontrolli i fluksit të emigrantëve, lufta ndaj krimit dhe trafikut të qenieve njerëzore. Kjo do të jetë hera e parë që Frontex do të kryejë një operacion në territorin e një vendi jo të BE-së. Komisioneri Dimitris Avramopoulos, tha se misioni i Frontex në Shqipëri është një etapë e re e bashkëpunimit mes Shqipërisë dhe BE-së dhe sqaroi se misioni nuk do të cënojë sovranitetin e shtetit shqiptar.

Mediet më prestigjioze ndërkombëtare i kanë kushtuar një vëmendje të veçantë bashkëpunimit mes Shqipërisë dhe “Frontex” (Agjencia Europiane e Ruajtjes së Kufijve dhe Bregdetit) që është edhe bashkëpunimi i parë i kësaj agjencie me një vend jo anëtar të BE-së. “Komisioni Europian njoftoi dërgimin e një ekipi për të ndihmuar autoritetet shqiptare në forcimin e menaxhimit të kufijve dhe të rritjes së sigurisë në kufij me Greqinë”, shkruan agjencia gjermane zyrtare e lajmeve, DPA.

Kryeministri Edi Rama përshëndeti këtë hap shumë të rëndësishëm në marrëdhëniet mes Shqipërisë dhe Bashkimit Europian dhe vlerësoi se do të përforcojë gjithashtu edhe bashkëpunimin në fushën e sigurisë”, komenton agjencia franceze zyrtare e lajmeve, AFP duke cituar njëkohësisht edhe kryeministrin e Shqipërisë. Nga ana tjetër, agjencia italiane zyrtare e lajmeve, ANSA, thekson se “duke filluar nga nesër 50 anëtarë të Frontex, që vijnë nga 11 vende të Bashkimit Europian, do të jenë në krahë të kolegëve të tyre shqiptarë në kufirin mes Shqipërisë dhe Greqisë, në misionin e parë në një vend jo anëtar të BE-së”.

“E dimë që presioni është i lartë dhe se kjo rrugë është dinamike dhe duhet të jemi gati në rast se rrjedha e emigrantëve të jashtëligjshëm rritet në verën e këtij viti”, theksoi për “Reuters” drejtori ekzekutiv i “Frontex”, Fabrice Leggeri. “Shqipëria është e vendosur t’i tregojë vendeve të BE-së se po lufton seriozisht krimin e organizuar kështu që mund të rrisë shanset për të hapur negociatat me Brukselin”, thekson agjencia prestigjioze britanike. Jehona e këtij bashkëpunimi është pasqyruar edhe në mediet përtej Atlantikut si “Montreal Gazette”, “Fox News”, “Toronto City News”, “Vancouver Sun” etj.