Fushata “derë më derë”, Manastirliu në Durrës: Të infensifikojmë vaksinimin anti-covid

Ministrja e Shëndetësisë dhe Mbrojtjes Sociale, Ogerta Manastirliu, pasditen e sotme ka takuar kryetaren e Bashkisë së Durrësit dhe drejtuesit e njësive administrative të kësaj bashkie. Manastirliu tha se duhet të intensifikohet fushata “derë më derë” që qytetarët të sqarohen dhe të binden për t’u vaksinuar.

“Unë e di që përgjatë gjithë kësaj kohe qytetarët përballen edhe me hezitim, përballen me ata të ashtëquajturit “ekspertë” të cilët në mënyrë krejt të papërgjegjshme hedhin tym mbi vaksinat, për vaksinat që përdoren, mbi proceset e vaksinimit, mbi çfarë mund të sjellin vaksinat që e kanë tërësisht të pabazuar. Ndërkohë që patjetër që ajo çfarë duhet bërë në terren është intensifikimi i përgjigjies ndaj dyshimit të shkaktuar nga këto me gjoja “ekspertë” e “gjithollogë” që dalin në mënyrë të papërgjegjshme dhe helmojnë mendjen e qytetarëve”, tha Manastirliu.

Duke theksuar që të gjitha strukturat e Ministrisë së Shëndetësisë janë në terren, Manastirliu tha se duhet që të angazhohen të gjithë, në të gjitha nivelet, për të kryer vaksinimin e popullatës si e vemtja armë e gjithëpranuar që garanton shëndetin dhe jeën e qytetarëve.

“Cila është arma që kemi ne sot? Vaksina. Është arma e mirënjohur, e gjithëpranuar në të gjithë vendet e botës e cila garanton ndërprerjen e zinxhirit të infeksionit dhe garanton shëndetin dhe jetën e qytetarëve. A jemi aty ku duhet? Jo, nuk jemi aty ku duhet. Sepse në fakt për të qenë aty ku duhet, duhet që të angazhohemi të gjithë, qoftë si qytetarë, qoftë si persona të angazhuar në detyra publike dhe deri në nivelet e larta të drejtimit, siç janë të gjitha strukturat e shtetit, patjetër dhe bashkitë”, tha Manastirliu.

Kryetarja e Bashkisë Durrës, Emiriana Sako tha se është shumë e rëndësishme të mbështësim Ministrinë e Shëndetësisë në këtë proces kaq sfidues, duke informuar qytetarët dhe duke i ftuar të shkojnë drejt qendrave të vaksinimit. Prej fillimit të vaksinimit janë kryer në total 1,803,799 doza të vaksinës ndaj Covid-19. 834,469 qytetarë i kanë kryer të dy dozat e vaksinës anti-covid.