Gara për anëtarin e KLP, Marku mban peng vakancën

Kryeprokuroja e Përkohshme, Arta Marku nuk ka hapur garën për plotësimin e vendit vakant në KLP pas shkarkimit të prokurorit Gent Osmani. Sipas ligjit, njoftimi për pjesëmarrjen në garë duhet të ishte publikuar që më datën 2 gusht por Prokuroria e Përgjithshme e ka justifikuar këtë qëndrim me mungesën e prokurorëve që janë me pushime.

Osmani u shkarkua më 31 korrik të këtij viti nga Komisioni i Posaçëm i Apelimit, duke lënë vakant karriken e tij në Këshill. 24 orë pas këtij shkarkimi, vendimi i zbardhur dhe kërkesa për zëvendësimin e tij i është adresuar prokurores së përgjithshme, e cila duhet të kishte njoftuar hapjen e garës dhe më pas thirrjen e Asamblesë së Prokurorëve. Kjo gjë nuk ka ndodhur.

Paçka se letra e Këshillit të Lartë të Prokurorëve ka mbërritur në zyrën e Markut më datën 2 gusht, në faqen zyrtare të Prokurorisë së Përgjithshme, nuk është bërë asnjë njoftim drejtuar prokurorëve për të shprehur interesin për këtë post vakant.