Gazetarët italianë nën trysninë e mafias

Gazetarët që shkruajnë lidhur me krimin e organizuar në Itali po përballen me një rritje alarmante të akteve kriminale që kanë në shënjestër ata dhe punën e tyre, kjo sipas një raporti të Komisionit anti-mafia të Parlamentit Italian.

Raporti tregon se gazetarët u janë nënshtruar 2.060 akteve armiqësore nga mafia përgjatë viteve 2006-2014, me kërcënimet dhe sulmet që arritën kulmin në gjysmën e parë të vitit të fundit.

Gjithashtu aty zbulohet se në “fare pak incidente” autorët janë identifikuar, gjykuar dhe dënuar. “Rritja në aktet armiqësore kundër gazetarëve është alarmante,” deklaroi kryetarja e komisionit anti-mafia të Parlamentit Italian Rozi Bindi.

Mafia po përdor metodat tradicionale në përpjekjet për frikësuar gazetarët investigativë, duke djegur makinat e tyre, duke u dërguar zarfe me plumb, si dhe duke i kërcënuar verbalisht.

Dokumenti gjithashtu thekson se të korruptuarit që bashkëpunojnë me mafian dhe madje dhe vetë mafiozët po përdorin gjithnjë e më tepër mjetet ligjore kundër gazetarëve si mjet frikësimi.

Raporti vë në dukje se dy nga rajonet më të rrezikshme për gazetarët mbeten Kalabria, zonë e Ndragetës, dhe Siccilia, vendlindja e Kosa Nostras.

Aktualisht rreth 20 gazetarë italianë jetojnë nën mbrojtjen e policisë, në një kohë që nëntë janë vrarë nga mafia gjatë viteve të fundit.