Gazetari italian që u rrah nga shqiptarët: Mendova se do vdisja

Vittorio Brumotti, gazetari i njohur italian i “Striscia la notizia”, ka rrëfyer dhunën që ka pësuar dje nga dy shqiptarë, atë e bir, të cilët e kanë rrahur keqazi. Ai ka thënë se është trembur për vdekje dhe madje ka menduar se mund të vdiste.

“Kam qenë duke u stërvitur me tim atë dhe dy atletë që marrin pjesë në botërorin e bike trial. Po ndiqja makinën e sigurisë, që drejtohej nga një miku im, në të cilën ishte edhe i biri. Në atë moment makina e sigurisë parakalohet nga një makinë tjetër, nga e cila është hedhur ujë në fytyrën e mikut tim dhe më pas edhe një shishe drejt makinës. Miku im iu tha “çfarë po bëni?” Makina ndaloi dhe djali i drejtuesit doli dhe qëlloi Fabion në fytyrë me grusht. Unë, duke parë atë të trembur, vrapova tek ai dhe e gjenda veten në mes. 

Jam goditur në fytyrë, nga syri i djathtë, që nuk ishte shëruar ende nga një rrëzim i një viti më parë. Pastaj erdhi edhe babai i djalit, që gjithashtu filloi të më godiste. Goditën edhe tim atë, që ishte rrëzuar. Unë dhe im atë u ndjemë vërtet të rrezikuar për vdekje. Më kërcënuan me vdekje pasi më rrahën dhe kërcënuan madje edhe ata që filmuan sherrin”, ka thënë ai.