Gjergj Luca sjell modelin e tij si shembull i nismës “Puno dhe jeto aty ku ke zemrën”

Në mesin e 120 kompanive pjesëmarrëse në Panairin Shqiptar të Punës, “Puno dhe jeto aty ku ke zemrën”, të mbajtur në Athinë, spikati prania e “Rozafa”-s, liderit të padiskutueshëm në fushën e akuakulturës. Ky panair, i cili ofroi vende pune me paga më të mira se ato të pozicioneve të ngjashme në Greqi, përbënte një mundësi konkrete për emigrantët shqiptarë që të konsideronin rikthimin në atdhe, për të investuar përvojat dhe kapitalin e tyre në zhvillimin e Shqipërisë.

Mes emrave që e kanë mishëruar më së miri këtë filozofi qëndron Gjergj Luca, një sipërmarrës vizionar dhe një model suksesi. Përmes një videoje të publikuar në rrjetet sociale, ai ndau historinë e tij të rrugëtimit të gjatë, sfidave dhe betejave që ka përballuar për të arritur aty ku është sot. Në fjalët e tij, Luca nënvizoi mesazhin e tij të fortë për të gjithë emigrantët shqiptarë:

“Emigracioni nuk është turp, është shkolla e sakrificës dhe e dinjitetit. Pasi je maturuar, kthehesh në atdhe më i fortë, për ta bërë atdheun tënd të fortë. Historia ime është në këtë video…”

Duke qenë një ndër sipërmarrësit më të angazhuar në promovimin e investimeve vendase dhe në krijimin e vendeve të reja të punës, Luca përfaqëson një model të gjallë të asaj që ky panair synon të realizojë: ndërgjegjësimin e emigrantëve mbi rëndësinë e kontributit të tyre për zhvillimin e Shqipërisë. Historia e tij, e mbushur me sfida, punë dhe përkushtim, është dëshmi e gjallë se suksesi ndërtohet me guxim, vizion dhe kthim të vlerave në vendlindje.

Ky panair, i pari i këtij lloji, nuk është thjesht një event rekrutimi, por një thirrje e fuqishme për ata që duan të bëhen pjesë e transformimit ekonomik dhe social të Shqipërisë. Për shumë emigrantë, ai përfaqëson jo vetëm një mundësi profesionale, por edhe një ftesë për t’u rikthyer në tokën e tyre, aty ku kanë zemrën.
Albert Vataj