Gjosha: Kemi ende korrupsion dhe krim të organizuar. KE të tregojë qartë kushtet për Shqipërinë

Ish-ministrja e Integrimit, Klajda Gjosha nuk e sheh me shumë nota pozitive raportin e Komisionit Europian për Shqipërinë, pasi thekson se ende në vend ka korrupsion dhe krim të organizuar. Ish-deputetja e LSI-së mendon që ka ardhur koha që KE-ja të jetë më e qartë se çfarë kushte duhet të plotësojë Shqipëria për të marrë datën e konferencës së parë ndërqeveritare.

Për sa i përket datës së konferencës së parë ndërqeveritare, Gjosha u shpreh se është e vështirë të vendoset brenda këtij viti pasi është një proces që kërkon kohë. Gjosha më tej shtoi se procesi i negociatave është jetik për vendin.

”Më erdhi keq të dëgjoja sot të njëjtin progres-raport për 5 vite sepse Shqipërisë i rekomandohet një datë, por është e njëjta gjuhë e përdorur nga KE. Nuk pashë asnjë fjali të re, asnjë qëndrim konkret. Unë mendoj që përveç ngërçit që kanë vendet që aspirojnë të bëhen pjesë e BE, është dhe një tjetër ngërç në gjuhën e përdorur, por që kuptohet që ka ardhur momenti të kalojmë në një gjuhë ndryshe.

Sot nuk kemi më korrupsion, nuk kemi më krim të organizuar, kemi ne një reformë zgjedhore e cila e ka zgjidhur ngërçin e zgjedhjeve në Shqipëri? Unë nuk besoj se këto kushte janë plotësuar, pavarësisht hapave që mund të bëhen.

Nuk shoh të kemi një plotësim 100% të këtyre kushteve dhe ndoshta ka ardhur koha që KE të jetë më e qartë. Çfarë duhet të plotësojë Shqipëria 100% që të jetë gati? Mënyra se si po funksionon sot nuk po shkon drejt zgjerimit”,-tha në ”Ora News”.