Gjykata ”kyç” mjekët që operuan Lamajn/ Avokatët: Shpëtuan një jetë

Burg ka dhënë Gjykata e Kurbinit për dy mjekët e arrestuar për moskallëzim krimi, pasi operuan në fshehtësi Eduart Lamaj, autori kryesor i dyshuar për vrasjen e Paulin Gjergjit dhe Bujar Likës në Laç. Gjykata ka pranuar kërkesën e prokurorisë, duke vendosur masën e sigurisë “arrest në burg” për mjekët Viktor Marku dhe Besim Lama, të vënë nën akuzë për dy vepra penale, atë për “moskallëzim krimi” dhe “veprime që pengojnë zbulimin e së vërtetës”.

Avokatët mbrojtës të mjekëve, folën pas seancës. Avokati i mjekut Besim Lama, tha se klienti i tij nuk e ka takuar autorin, nuk e njeh dhe as nuk pak marrë para. “E kanë marrë në telefon dhe i ka ardhur si pacient jo Eduart Lamaj, por një tjetër dhe klienti im meqë nuk ishte i kësaj fushe pasi kishte nevojë për ortoped e ka drejtuar te mjeku Viktor Marku. Klienti im nuk i njeh personat, nuk kanë as kontakt dhe vetë mjekët nuk e njohin njëri-tjetrin. Ai as ka asistuar dhe as ka bërë ndërhyrjen e Eduart Lamaj pasi nuk ishte në fushën e tij, pra nuk ka si të ketë marrë gjë, thjeshtë ka referuar rastin te një specialist i fushës”.

Kurse avokati mbrojtës i Viktor Markut, tha se klienti i tij thjeshtë ka operuar një pacient dhe ka shpëtuar një jetë njerëzore pa pasur dijeni se kush ishte ai. “Këta ushtruan detyrën e tyre funksionale duke bërë dhe betimin e Hipokratit duke shpëtuar një jetë njerëzore pa pasur dijeni se kush ishte”.

30-vjeçari Lamaj ka pranuar përfshirjen në ngjarje, duke thënë se pronari i hotelit, vëllai i Bujar Likës, i kishte borxh paratë e drogës. Ai ka vijuar më tej duke thënë se nuk kishte qëllim t’i vriste, por ato hapën zjarr për këtë arsye ka qëlluar.