Gjyqtarë borxh për të funksionuar Gjykata e Lartë

Aktualitet E Premte, 6 Gusht 2021 03:32

E mërkura ishte dita e gjyqeve penale në Gjykatën e Lartë, por të gjitha dështuan. Shkak ishte mos formimi i Kolegjit Penal, që prej muajsh ka vetëm 3 gjyqtarë. Për të plotësuar numrin me pesë anëtarë për çdo trupë, siç e kërkon ligji, që prej muajit korrik 2017 Gjykata e Lartë u ka hyrë borxheve.

Kjo është moda më e re e kësaj gjykate, e cila merr borxh gjyqtarë nga Kolegji Administrativ dhe Civil, si edhe anasjelltas për të zhbllokuar situatën. Në mjaft raste, sikurse këtë të mërkurë, trupa nuk formohet e për këtë zvarritjet janë tashmë diçka normale .

Aktualisht Gjykata e Lartë ka nëntë anëtarë të ndarë në tre kolegje, por që asnjëri nuk është i plotë nëse nuk huazohen gjyqtarë nga kolegjet e tjera. Gjykata e Lartë, e cila teorikisht duhet të kishte 19 gjyqtarë, është bllokuar dhe në pamundësi për të thirrur mbledhjen e kolegjeve të bashkuara, numri minimal i të cilit duhet të jetë 13 gjyqtarë.