Gracka” shqiptare për ministrin çek të financave, 9 të arrestuar

Një bandë kriminale me 9 pjesëtarë, ku shumica ishin shqiptarë, kishte planifikuar të grabiste vilën e ministrit çek të financave Andrej Babish dhe të merrte peng djalin e tij. Por plani i tyre u zbulua nga policia dhe 9 pjesëtarët u vunë në pranga. Ngjarja daton një vit më parë, por mediat çeke kanë arritur ta zbulojnë dhe të bëjnë publik rastin.

Portali çek respekt.cz bën të ditur se vila e ministrit Babish ndodhet në zonën e pasur rezidenciale të Pragës, mjaft e lakmuar nga bandat e grabitësve. Policia çeke ra në gjurmë të grupit, që po planifikonte të hynte në shtëpinë e ministrit për të grabitur, përmes përgjimeve të vazhdueshme të bisedave telefonike.

Në objektiv ishin edhe vila të dy biznesmenëve. Por grabitësit nuk ndërmorën asnjë veprim, pasi rezidenca e Ministrit të Financave ishte e mbikqyrur nga një sistem i sofistikuar sigurie. Për këtë arsye, ata vendosën t’i bënin presion ministrit, duke i marrë peng të birin. Por nuk ia arritën, pasi ishin të mbikqyrur gjatë gjithë kohës nga policia, që i vuri në pranga.

Banda në fjalë drejtohej nga shqiptarë, identiteti i të cilëve nuk bëhet i ditur, megjithatë burime policore thanë se bëhet fjalë për persona me precedentë kriminalë. Hetimet janë drejt përfundimit dhe pritet që një padi penale të ngrihet zyrtarisht nga autoritetet çeke.