Grupet islamike djegin pemën e Krishtlindjeve

Qindra protestues dolën në rrugë në zonat e krishtera të Damaskut (Siri) pas djegies së një peme të Krishtlindjes në qytetin Hama në Sirinë qendrore. Demonstruesit brohoritën parulla për mbrojtjen e të drejtave të krishterëve dhe marshuan drejt selisë së Patriarkanës Ortodokse.

“Nëse nuk na lejohet të jetojmë besimin tonë të krishterë në vendin tonë, siç kemi bërë më parë, atëherë nuk i përkasim më këtij vendi” – tha një protestues. Protestat shpërthyen pas publikimit të një videoje që tregonte luftëtarët islamik me kapuç duke i vënë zjarrin një peme të Krishtlindjes në qytetin me shumicë të krishterë të Suqaylabiyah.

Sipas Observatorit Sirian për të Drejtat e Njeriut, luftëtarët ishin të huaj nga grupi islamik Ansar al-Tawhid. Një udhëheqës fetar nga Hayat Tahrir al-Sham (HTS) që qeveris vendin premtoi dënim për autorët.