”Hamshahri” vendos Trumpin dhe udhëheqësit evropianë në listën e hakmarrjes së Khameneit

Gazeta iraniane ”Hamshahri”, një e përditshme ultrakonservatore dhe provokuese nga bashkia e Teheranit, publikoi një listë figurash që duhet të paguajnë për vdekjen e Ajatollah Ali Khameneit, përfshirë Donald Trumpin, Benjamin Netanyahun dhe Emmanuel Macronin.

Udhëheqësi Suprem i Iranit, Mojtaba Khamenei, deklaroi në një mesazh të shkruar të shtunën se “hakmarrja” ishte “e pashmangshme” pas funeralit të babait të tij, i cili u vra në një sulm izraelito-amerikan më 28 shkurt, ditën e parë të luftës.

“Kjo hakmarrje është vullneti i kombit tonë dhe duhet të kryhet, në mënyrë të pashmangshme. Këta kriminelë, emrat e të cilëve janë në një listë, do të marrin në varret e tyre dëshirën për një vdekje paqësore në shtretërit e tyre”, deklaroi Mojtaba Khamenei, i cili pasoi të atin si Udhëheqës Suprem, në një tekst që i atribuohet atij.

Gazeta ”Hamshahri” publikoi një infografik online të shtunën në mbrëmje që përsërit këto vërejtje.

Megjithatë, ai nuk u shfaq në botimin e saj të shtypur të së dielës.

Ai tregon foto të 13 figurave që duket se i referohen “listës” së përmendur nga Mojtaba Khamenei, e cila nuk përfshinte asnjë emër.

Në këtë listë janë edhe sekretari i Shtetit i SHBA-së Marco Rubio dhe disa udhëheqës evropianë, përfshirë presidentin francez Emmanuel Macron, kryeministren italiane, Giorgia Meloni, kancelarin gjerman Friedrich Merz dhe kryeministrin britanik në largim Keir Starmer.

Gjatë luftës, Irani akuzoi vendet evropiane se nuk kishin dënuar sulmet në territorin e tij dhe madje edhe për bashkëpunim duke lejuar avionët ushtarakë amerikanë të fluturonin mbi hapësirën e tyre ajrore./ a.jor. ATSH