“Harta e Enver Hoxhës tregon ku bien tërmetet dhe sa ballë”, Lubonja: Të vdekurit e 26 nëntorit mund të ishin evituar plotësisht

Analisti Fatos Lubonja tha në emisionin “Real Story” të gazetarit Sokol Balla, në News24, se në vendin tonë kanë ndodhur dy tërmete, ai natyror, që shkaktoi dëme të mëdha dhe vrau njerëz, dhe tërmeti ndaj besimit që duhet të kemi tek institucionet dhe shteti.

Sipas tij, tërmeti ka rrëzuar shumë keq godinat e shtetit, ndërsa shtoi se mund të ishin evituar plotësisht vdekjet.

“Duhet të bëjmë një dallim kryesor, që nuk bëhet fjalë aq shumë për tërmetin. Këtu ka dy tërmete, njëri është ai që ra dhe shkaktoi dëme, tërmeti tjetër që ka rënë është ndaj besimit që duhet të kemi tek institucionet, shteti, e të gjithë ato organizma që duhet të punojmë që në raste tërmetesh të tilla të kemi minimumin e dëmeve.

Është tërmeti që ka rrëzuar shumë keq godinat e shtetit tonë. Të vdekurit që janë drama më e madhe materiale për mendimin tim mund të ishin evituar plotësisht, nëse ne do kishim marrë disa masa ndaj ndërtesave.

Ne kemi rrëzim ndërtesash në Kënetë, ndërkohë që ne e dimë se aty nuk duhet të ndërtojmë, ka ligje, por aty vdiq familja Lala. Edhe nëse ndërton aty, duhen disa parametra.

E dyta, u paralajmërua një tërmet në shtator, si dhe presidenti tha për një tërmet të fortë, por qeveria u tall. Në Thumanë ndërtesat ishin të amortizuara, por nuk kishte ndërhyrje.

E treta, kemi dëmtime në plazhin e Durrësit, dhe aty pati të vdekur. Është ndërtuar pa plan. Ke një hartë të Enver Hoxhës se si duhet ndërtuar, ku mund të bien tërmete dhe sa ballë. Shqipërinë e kanë marrë në dorë druvarët dhe janë hequr nga skena specialistët, ekspertët, etj, dhe ky është problemi. Për të marrë atë që thotë ministri se situata është nën kontroll, përsëri na përdorin të huajt. Për mendimin tim situata është kritike”, tha Lubonja.