Hetimet për Arben Frrokun, Tahiri: Policia bëri detyrën

Policia e Shtetit ka respektuar me përpikmëri detyrën për Arben Frrokun. Ky është rezultati i hetimit të ekspertëve ndërkombëtarë sipas Ministrit Tahiri.

Tahiri: Unë kam kërkuar personalisht një vlerësim të gjithave veprimeve të policisë nga partnerët ndërkombëtarë që ditën që është marrë vesh lajmi. Partnerët ndërkombëtarë dhe misionet e ekspertizës në Shqipëri kanë hetuar në mënyrë të pavarur mënyrën si ka vepruar policia e shtetit. Dje është bërë raporti dhe i është dorëzuar të gjithë partnerëve dhe policia e shtetit ka bërë detyrën konform ligjit.

Pse nuk ishte shpallur në kërkim në faqen e Inperpol Tirana?

Tahiri: Të lutem më lini të mbaroj. Kaq mund t’ju mjaftojë për këdo që ka ende kuriozitetin nëse policia e shtetit vepron sipas ligjit apo jo.

Ministri tha më tej se të mërkurën është dorëzuar raporti për ekstradimin e Arben Frrokut nga Hollanda drejt vendit tonë.

Deklaratat Tahiri i bëri pas ceremonisë përkujtimore të policëve të rënë në krye të detyrës.

Tahiri: Vepra e atyre që dhanë jetën për të bërë Shqipërinë kjo që është sot është këmbana më e madhe e kujtesës për ne që sot jemi gjallë dhe kemi detyrën për të vazhduar veprën e tyre. Është këmbana më e madhe dhe thirrja më e fortë për të votuar reformën në drejtësi që është e vetmja mënyrë pa pushkë dhe pa armë për të vazhduar siç duhet atë që nisën ata që dhanë jetën për të bërë Shqipërinë më të drejtë.