Hetimet për Klodianin vijojnë, rikthehet në detyrë kolegu i Hajdarajt

Verifikimet shtesë të Prokurorisë nuk arritën të japin të dhëna se polici i ”Shqiponjave”, Nevaldo Hajdaraj dhe viktima Klodian Rasha kishin njohje të mëparshme. Pengesë për mbylljen e hetimeve dhe dërgimin e çështjes në gjyq po bëhet ekspertimi i armës së gjetur më shumë se 100 metra larg vendngjarjes.

Me ndihmën e disa ekspertëve të huaj që asistojnë policinë janë kontaktuar dhe po vijojnë procedurat me disa laboratorë të specializuar jashtë vendit, ku pritet të dërgohet pistoleta pa gjurmë dhe e paidentifikuar se kujt i përket.

Pas disa ditësh i pezulluar, efektivi tjetër i ”Shqiponjave”, Erion Gjore që ndodhej ditën e ngjarjes së bashku me Nevaldo Hajdarajn, është rikthyer në detyrë. Nevaldo Hajdaraj që qëlloi mbi 25-vjeçarin në orët e para të mëngjesit të 8 dhjetorit, aktualisht akuzohet për vrasje në kapërcim të kushteve të mbrojtjes së nevojshme.