Ambasadorja e SHBA-së në Tiranë Yuri Kim, kërkon që ish-kryeministri Sali Berisha të mos jetë deputet në shtator, dhe kjo ka nxitur një debat të heshtur brenda PD-së.
Ish-diplomati Dritan Hoti thotë se Shqipëria ndodhet përballë një procesi transformues dhe këto lëvizje janë normale. Sa i përket thirrjes për ta përjashtuar Berishën nga grupi parlamentar në shtator, Hoti thekson se kjo është një lëvizje më shumë e rafinuar për ta parë a do të vendoset Basha në të njëjtën korsi përkundrejt SHBA-së.
”Kjo është një hallkë kryesore. Diplomatët amerikanë hera-herës përdorin mekanizma dhe mjete që quhen mjete imponuese, por që janë qëllim-mira. Unë besoj që diplomatët amerikanë kanë disa kanale informacioni dhe ata janë të ndërgjegjshëm që lideri aktual i opozitës nuk ka kapacitetin, mundësinë dhe në kushtet aktuale që të imponojë daljen nga grupi parlamentar të ish-kryeministrit Sali Berisha, por ishte një lëvizje më shumë e rafinuar për ta parë a do të vendoset Basha në të njëjtën korsi përkundrejt SHBA, ishte një lëvizje testuese për veprimet e mëvonshme të diplomacisë amerikane në lidhje me këta eksponentë që përfaqësojnë opozitën shqiptare”, tha për ”Ora News”.
