Hoxha: Qytetarët të durojnë, “Unaza e Madhe” projekt i rëndësishëm. I vetmi shqetësim, autobuzët firzamonikë
Devijimet për shkak të punimeve të bëra në lotin e parë të Unazës së madhe vijojnë të jenë një shqetësim për të gjithë qytetarët. I ftuar në studion e Ora News, eksperti rrugor, Gëzim Hoxha, u shpreh se qytetarët duhet të tregojnë durim, pasi ky projekt është i paralajmëruar dhe shumë i rëndësishëm.
Hoxha: Ky është një projekt i paralajmëruar që nga vitet ’80-të, nuk është një projekt i sotëm. Është një gjë që duhet të bëhet, prandaj duhet të kemi durim. Kjo rrugë, ky rrethrrotullim është i domosdoshëm, sepse bëhet një matje trafiku, është matur trafiku, është matur intensiteti i lëvizjes, është matur gjithë koha që humbasin njerëzit, sepse duhet të kuptojmë që nuk është vetëm mërzitja qësa të kalojmë trafikun, por është edhe një vonesë që kthehet në shpenzime.
Kjo është një periudhë që do të zgjasë 4 muaj, një perudhë e gjatë, prandaj duhet të kemi durim. Por duhet të kuptojmë që në të ardhmen do të kemi shumë gjëra të zgjidhura.
Ndërkohë punimet në sipërfaqe duket se u filluan në një kohë që moti nuk favorizon, megjithatë për ekspertin Hoxha, kompania nuk kishte rrugë tjetër, pasi puna aty është me faza. Sipas tij punimet janë në fazën e duhur.
Hoxha: E kanë bërë ata, përgjatë gjithë kësaj kohe kanë punuar. Edhe në korrik, edhe në gusht edhe në shtator, por këto janë procese pune që ndërthuren me njëri-tjetrin. Ky proces pune që po bëhet në pjesën e sipërme, tani e ka radhën.
Nuk mund të bëhen para nënkalimeve, sepse poshtë ka vepra të tjera arti. Nuk është probblemi që ata po bëjnë një punë sipërfaqësore, e që ata nuk janë në kohë. Ata janë tamam në kohë dhe kjo këtë radhë pune ka. Devijimet rëndojnë edhe më shumë qytetarët apo edhe banorët që banojnë në lagje të tilla.
Një tjetër temë e rëndësihme për të cilën foli është ajo e korsive të biçikletave apo për ngushtimet që janë bërë nëpër rrugët e Tiranës. Për Hoxhën, të gjitha ndërhyrjet janë të studiuara.
Hoxha: Jo nuk ka problem kjo, kjo është një risi botërore. Në të gjithë botën janë bërë korsitë e biçikletave, dihet në të gjithë botën njerëz si ne ankohen për këtë punë. Por kjo bëhet me studim, nuk bëhet kështu me pamje sipërfaqësore e me opinione.
Bëhet një matje grafiku, sa mjete kalojnë, sa duhet të kalojnë dhe duhet dhënë përparësi një koncepti të ri. Koncepti i ri është që duhen lënë më pak automjete dhe më shumë biçikleta. Mesa kam parë unë është rruga e “Durrësit” dhe ajo “Mine Peza”, aty është matur trafiku.
Autobuzët firzamonikë janë i vetmi shqetësim për të.
Hoxha: Një tjetër shqetësim janë edhe autobuzët firzamonikë në qytet. Përshembull nëse këto autobuzë futen deri në qendër, është dikush që do të shkojë tek spitalet, atëherë ai qytetari është i detyruar të marrë një taksi një gjë. Prandaj është e gabuar futja e këtyre autobuzëve në qytet.
Një firzamonikë 25 metra, është e barabartë me 7 apo 8 makina. Edhe automjetet e tonazhit të rëndë janë një problem. Intensiteti më i madh i punës, duhet bërë natën, ditën duhet të jenë shumë pak. Me orë të alternuara e të studiuara mirë, në mënyrë që të mos krijojnë trafik në qytet dhe të mos e ndotin atë.
