Hoxha: Sondazhi i IPR-ORA na dha Shqipërinë ashtu siç është

Aktualitet E Premte, 24 Shtator 2021 08:44

Analisti Artan Hoxha tha se sondazhi i IPR Marketing dhe RTV ORA tregoi Shqipërinë ashtu siç është. I ftuar në studion e lajmeve, me gazetaren Beti Njuma, Hoxha tha se shumica e shqiptarëve thonë se këtu jetohet keq.

Artan Hoxha: Them që rezultatet më përputhem me perceptimet e mia dhe vlerësimet e mia. Në krahasimet që jepte me tre vitet më parë gjendja dukej jashtëzakonisht më e rënduar. Shqiptarët thonë se 62% jetohet me keq në Shqipëri, thonin që duan të ikin. Sondazhi i bërë nga IPR dhe nga televizioni ORA na dha Shqipërinë ashtu siç është.

Duke analizuar sondazhin, Hoxha tha se kishte dy qëndrime për qasjen opozitare.

Artan Hoxha: Në sondazh dilte qartë dy lloj qëndrimesh në raport me qasjen opozitare. Kishte një përkrahje goxha prezentë për djegien e mandateve dhe rrugën e protestave, por kishte edhe pikëpyetje apo kundërshti mbi këtë taktike opozitare.

Beti Njuma: Nuk pajtohemi ishin 61.1%?

Artan Hoxha: Këtu brenda ke gjithë ata që votojnë qeverinë, këta nuk do i konsiderosh. Do konsiderosh ata që mbështesin opozitën dhe mes atyre që mbështesin opozitën, pra ai 55% dukeshin dy pozicione, një pozicion pro rrugës radikalë të ndjekur nga opozita dhe pjesa tjetër ndoshta mendojnë një rrugë tjetër. Por të dy bashkohen në një gjë, që nuk e durojnë këtë qeveri dhe janë në shumicë dërrmuese në favor të partive opozitare.

Hoxha tha se nëse rezultatet e sondazhit do të përktheheshin në mandate, opozita e sotme do merrte 80 mandate dhe qeveria e sotme 60.

Artan Hoxha: Pyetja do të ishte kështu: Nëse do bëhen zgjedhjet politike, sot në 3 prill për kë do ta jepni votën? Partitë opozitare ishin shumica 53%, 44 për PS, por edhe ai 3% për partitë e tjera, PBDNJ, PDIU janë partitë opozitare. Prandaj them jemi në raportin 55-45. Sikur këto të përktheheshin në mandate parlamentare ne do të ishim në 80 mandate partitë e sotme opozitare dhe 60 mandate qeveria e sotme. Pra ne kemi një përmbysje në shoqëri përkundrejt situatës zyrtare të trashëguara nga zgjedhjet e 2017. Mazhoranca në popull sot është minorancë dhe minoranca politike e 2017 sot është mazhorancë në mbështetjen popullore.

Kriza politike, Hoxha: Dy vezë që po përplasen, njëra do të thyhet

Analisti Artan Hoxha thotë se situata politike në vend është si “dy vezë që po përplasen dhe njëra do të thyet.”

Beti Njuma: Në këto momente çfarë do të bëhet me krizën politike, do të vazhdojnë protestat, qeveria do të vijojë mbledhjet e saj, Kuvendi po ashtu punimet?

Artan Hoxha: Këto janë dy vezë që po përplasen, njëra do të thyhet. Dr. Noto e tha, veza opozitare po forcohet.

I ftuar në studion e lajmeve të RTV ORA, analisti tha se e vetmja zgjedhje janë zgjedhjet e parakohshme, për ti vendosur palët në kushtet të barabarta garimi.

Artan Hoxha: Kemi një qeveri që është gërshetuar me krimin, kemi një pushtet gjyqësor nën një dikatat të dukshëm të qeverisë. Nga ana institucionale duket si një problem pa zgjidhje. Tamam si rrethi vicioz që vjen vërdallë dhe nuk del dot. Ka vetëm një çarje të këtij rrethi vicioz,që do të ishte një proces i ri zgjedhor, që i vendos palët në kushte të barabarte garimi, që do të ishte përmes një qeverie tranzitore që nuk bën gjë tjetër vetëm se i jep një mesazh bandave të krimit, se ky model nuk ka të ardhme.