Humbja përballë Këlliçit për nënkryetarin e PD, Luçiano Boçi: Votimi është shumë subjektiv

Luçiano Boçi humbi postin e nënkryetarit të PD-së, dhe vendin e tij e zuri Belind Këlliçi, sipas votave të marra nga Këshilli Kombëtar. ”Momenti i votimit është moment i cili ka shumë elementë brenda, nuk është shumë i pastër si moment, është shumë subjektiv, nuk është shumë objektiv. Të dy kishim të njëjtat mundësi. Nuk e mendoj që Këlliçi ka lobuar më shumë. Këto janë gjëra që kanë relativitetin e vet. Nuk do hyj të gjej detaje”, tha Boçi në ”A2cnn”.

Berisha pas votimit të kupolës së re, tha se ky është ekipi më i mirë në histori. ”Është e drejta e zotit Berisha të japë atë përcaktim. Është ekipi i kryetarit të partisë në këtë rast dhe është e drejta e kryetarit të partisë të japë mendim. Ai bën një ballafaqim të ekipeve në vazhdimësi. Ekipet varen edhe nga momentumi politik. Nuk është i njëjtë ky momentum me atë para katër vitesh, kur ne ishim para një situate shumë të vështirë dhe ku ishte në lojë ekzistenca e PD.

Flas për momentin që unë jam zgjedhur nënkryetar i Partisë Demokratike. Zakonisht ne si shoqëri vuajmë nga amnesia, por edhe partitë politike në Shqipëri vuajnë nga amnesia. Duhet të konsiderojnë dhe atë që ka kaluar dhe nuk mund të krahasohen situatat e njëjta. Pra, ishte krejt situatë ndryshe atëherë dhe s’mund të thuash që dhe ai ekip s’ ishte i mirë. Kemi një situatë krejt ndryshe tani për atë çka vjen, është e drejta e kryetarit të partisë që t’i japë cilësime të tilla”.