I dha fund jetës duke u hedhur nga spitali, mesazhi i nënës: 30 pëllumba do të lëshohen drejt qiellit

Shqipëria u trondit nga rasti i parë i vetëvrasjes si pasojë e Covid-19. Xhino Koça i dha fund jetës më 13 gusht të vitit 2020, duke u hedhur nga dritarja e katit të tretë në spitalin Shefqet Ndroqi, ku po kurohej pasi ishte prekur nga virusi vdekjeprurës.

Nesër ai do të festonte 30 vjetorin e lindjes. Nëna e tij, stilistja e njohur Lira Koça ka kujtuar të birin me një mesazh prekës teksa ka treguar se këtë vit do të lëshohen 30 pëllumba e tollumbace të bardha drejt qiellit.

“Data 5 Mars është një nga datat e shënuara për familjen tonë. Çdo prag 5 Marsi, ne bëheshim gati të festonim ditëlindjen e të voglit të shtëpisë, Xhinos. Këtë vit është ditëlindja e 30-të e djalit tonë. 30 pëllumba dhe 30 tollumbacë të bardhë do të lëshohen drejt qiellit duke u kthyer në simbol të përqafimit tonë për Xhinon. Më 5 mars, ora 17:00 tek sheshi para Sfinksit ju që do keni dëshirë të merrni pjesë në këtë përvjetor të Xhinos jeni të mirëpritur. Familjarë, të afërm, miq e të njohur, të gjithë bashkë në këtë ditëlindje ndryshe. Për të zvogëluar sado pak distancën që mungesa fizike e Xhinos na bën të jetojmë. Përgjithmonë me ne Xhino”, shkruan Koça.