I konsideruar i pabanueshëm pas ekspertizës, nis prishja e pallatit të dëmtuar nga tërmeti në Durrës

Pas një pritjeje të gjatë dhe plot pengesa, më në fund ka nisur puna për prishjen mekanike të pallatit të dëmtuar nga tërmeti në lagjen nr. 5 të Durrësit.

Për vite me radhë ky pallat mbeti si një plagë e hapur e tërmetit të vitit 2019, ashtu si dhe disa godina të tjera në të njëjtën zonë banimi. Fillimisht ky objekt u mendua të riparohej nga vetë banorët, por një ekspertizë e thelluar tregoi se ishte i pabanueshëm (DS5) dhe duhej shembur.

Ndërkaq familjet e këtij pallati, sipas Bashkisë Durrës, kishin marrë më parë fonde për riparime (DS3), 500 000 lekë për familje.

Kryebashkiakja Sako konfirmoi një ditë më parë se familjet i kanë kthyer ato para, duke u regjistruar zyrtarisht në programin e rindërtimit për të marrë një apartament të ri kur objekti të rindërtohet.

Ndryshe nga pallate të tjera që u shembën me shpërthim të kontrolluar, këtu rreziku për pallatet e shumta përreth ishte shumë i lartë. Forcat xheniere vendosën që siguria e lagjes cenohej, ndaj ka nisur prishja e strukturës kat pas kati, po çmontohet pjesë-pjesë, duke filluar nga kati i 11-të.

Ky proces ndonëse kërkon më shumë kohë, i jep fund problemeve të mbi 50 familjeve që tani shohin dritë në fund të tunelit për t’u rikthyer në shtëpi të sigurta, por edhe për banorët e zonës pasi ky pallat ishte kthyer në një vatër problematike për jetën në komunitet.

Ndërkaq mësohet se një pjesë e familjeve të këtij pallati, për shkak të vonesave dhe problemeve me strehimin, kanë pranuar të strehohen në lagjen e re në Spitallë.

Pas prishjes mekanike të këtij objekti do të nisë ndërtimi i tij në të njëjtin truall.