Qytetarët që i përkasin kategorive në nevojë do përfitojnë tarifa më të ulëta për pajisjen me dokumente identiteti. Nisma u bë e ditur nga ministri i Punëve të Brendshme, Ervin Demo në ambientet e IdentiTek, ku u njoh nga afër me procesin e prodhimit dhe ofrimit të dokumenteve.
Reduktimi i kostove për qytetarët është një nga drejtimet ku pritet të përqendrohet puna e Ministrisë së Punëve të Brendshme dhe IdentiTek. Sipas ministrit, synimi është që përmirësimi i shërbimeve të mos nënkuptojë vetëm më shumë shpejtësi, por edhe më pak kosto për ata që kanë më shumë nevojë për mbështetje.
“Kemi nisur punën për uljen e tarifave të dokumenteve të identitetit për kategori të caktuara që kanë më shumë nevojë për mbështetje”, deklaroi Demo. Ndërkohë, po punohet edhe për thjeshtimin e procedurave. Pajisja me dokument identiteti përmes procedurës së zakonshme realizohet brenda 10 ditëve pune, ndërsa shërbimi i përshpejtuar brenda 3 ditëve pune.
Një pjesë e rëndësishme e ndryshimeve lidhet me shërbimet online. Qytetarët mund të blejnë kuponin dhe të gjurmojnë online ecurinë e dokumentit, ndërsa për personat që kanë vështirësi në lëvizje ofrohet mundësia e marrjes së shërbimit në banesë apo në spital, brenda dhe jashtë vendit. Shërbimet do të zgjerohen edhe për shqiptarët që jetojnë jashtë vendit. Përmes misioneve të posaçme synohet mbulimi i zonave ku ka komunitete shqiptare, por ku nuk ofrohen shërbime konsullore. Në vijim parashikohet zgjerimi i këtij shërbimi edhe në vende të tjera të Azisë dhe Australisë.
IdentiTek po orienton një pjesë të punës drejt modernizimit teknologjik dhe forcimit të sigurisë. Në bashkëpunim me AKSHI dhe AKSK, po punohet për Letërnjoftimin Digjital, ndërsa vijon zhvillimi i teknologjisë për pasaportën e së ardhmes, me synim përafrimin me standardet e vitit 2030. “Çdo përmirësim që bëjmë këtu duhet të përkthehet në diçka konkrete për qytetarin, më pak kohë, më pak kosto dhe më shumë shërbim”, tha ministri Demo.