Idrizi kundër Berishës: Parlamenti, jo vendi i kacafytjeve

Kreu i PDIU-së, Shpëtim Idrizi ka dënuar kaosin e krijuar sot në Kuvend nga PD-ja e Sali Berishës, veçanërisht në seancën e sotme parlamentare ku u votua projekt-buxheti dhe paketa fiskale e vitit 2024.

”Pamje të tilla tregojnë sesa pak ka ecur parlamentarizmi në Shqipëri. Parlamenti nuk vendi dy palëve që kacafyten por i të urtëve që diskutojnë dhe gjejnë zgjidhje të përbashkët. Unë vetë isha përgatitur për të thënë ato që më preokupojnë në këtë buxhet. Bëhet fjalë për buxhetin e një vendi të vogël të varfër.

Opozita padyshim duket se është në të drejtën e vetë që të protestojë apo të gjejë akte kur nuk gjen hapësirën. Për mua është gabim dhe retorika e opozitës kur thotë se nuk po na lënë të drejtën tonë për komisione. Është e drejtë e deputetëve. Nëse ne themi se do bëhemi prokurorë për të dënuar këta sigurisht që edhe pala tjetër do të reagojë.

Mendova se sot për projektbuxhetin opozita do të bënte armëpushim. Edhe ata vetë dhe ne të diskutonim të debatonim sepse sot duket se për 5 minuta të dy palët duket se e kryen detyrën e tyre. Kurse ne i kemi fjalimet në xhep”,-tha Idrizi.