Irani mund të zhvendosë rezervat e tij të uraniumit të pasuruar në një vend tjetër në rast të një marrëveshjeje me SHBA-në mbi programin bërthamor të Iranit, njoftoi ambasadori i Iranit në OKB, Amir-Saeid Iravani.
“Transferimi i uraniumit të pasuruar nga 20 deri në 60%nuk do të ishte një vijë e kuqe për Teheranin”, tha Iravani, duke shtuar se materiali mund të mbetet gjithashtu në Iran nën mbikëqyrjen e Agjencisë Ndërkombëtare të Energjisë Atomike (IAEA).
Megjithatë, ai theksoi se Irani nuk do të heqë dorë nga e drejta e tij për prodhimin vendas të uraniumit, një kusht që SHBA e refuzon fuqimisht.
Iravani gjithashtu përjashtoi çdo kufizim në programin e raketave balistike të Iranit dhe përsëriti se një marrëveshje e re do të varet, ndër kushte të tjera, nga heqja e sanksioneve ndërkombëtare, shkruajnë mediat e huaja.
Bëhet e ditur se komentet e tij vijnë disa orë pasi Ministri i Jashtëm iranian Abbas Arakchi tha se Irani ishte gati të vazhdonte negociatat mbi programin e tij bërthamor me SHBA-në, megjithëse i kërkoi Trumpit të zbuste tonin e tij.
“Nëse presidenti Trump është i sinqertë për arritjen e një marrëveshjeje, ai duhet të lërë mënjanë tonin e tij ofendues dhe të papranueshëm ndaj udhëheqësit suprem të Iranit, Ayatollah Khameneit dhe të ndalojë së fyeri miliona ndjekës të tij të sinqertë”, tha Araqchi.
“Mirësia lind nga vullneti i mirë, respekti lind nga respekti.”
Kohët e fundit, Trump tha se bisedimet e reja me Iranin do të zhvilloheshin “javën e ardhshme”, megjithëse nuk zbuloi detaje të tjera.
Disa raunde të mëparshme bisedimesh midis Uashingtonit dhe Teheranit nuk kanë arritur të prodhojnë një marrëveshje. /Telegrafi/