Italianët ikën pa paguar, pronari i restorantit në Berat: Na falënderuan për ushqimin. Mediat: Paskan qenë dinakë

Viku Kadëna, pronari i restorantit në Berat ku ndodhi edhe ngjarja aspak normale me turistët italianë në Berat, të cilët ikën me vrap pa paguar, shprehet se ka disa vite që punon me të huaj por kurrsesi nuk ka ndodhur një fenomen i tillë. Lokalin e punon së bashku me bashkëshorten e cila mbulon arkën dhe shërbimet.

“Ky grup ishte duke u argëtuar, na falenderuan për ushqimin ishin shumë të kënaqur. Ndërsa kishim shumë turistë të tjerë po u shërbenim menduam se do paguanin tek arka e cila ndodhet larg në dalje të lokalit. Për momentit nuk ka patur njeri tek arka, janë larguar nëpër rrugicat e mangalemit me vrap. Jo se më krijuan humbje të madhe, por le të bëhen shembull dhe ti ekspozojmë këta njerëz të cilët ulin poshtë veten e tyre. Lokali dhe bujtina është gjithmonë plot dhe s’kemi asnjë minutë pushim. Ndaj siç e kemi ne beratasit shprehjen “pastë dorën e mbar hajduti” ose ti përdorini ato lekë për një gjë të mirë”.

Një prej mediave italiane, ”Open Online” shkruan se bumi i turistëve italianë në Shqipëri, mesa duket ka sjellë edhe ata njerëz që kanë “zakone të këqija”. Ky është rasti i një grupi turistësh italianë që pasi darkuan në restorant “Guva” në Berat u larguan pa paguar një faturë prej 80 eurosh.