Kandidat nga burgu, zbulohet sa vota ka marrë Ilir Meta

KQZ ka publikuar rezultatin e numërimit elektronik në njësinë numër 10 në Tiranë. Sipas rezultateve të publikuara, Partia Socialiste ka marrë në këtë njësi 5304 vota, ose 49,03% të votave, ndërsa Partia Demokratike 3498 vota, ose 32,34% të votave.

Presidenti i Partisë së Lirisë, Ilir Meta ka marrë në këtë njësi 246 vota personale, teksa garonte në listën e hapur të Partisë Demokratike në Tiranë. Sjellim në vëmendje se Meta ndodhet në qeli, pas akuzave për korrupsion të ngritura nga SPAK ndaj tij.

Kjo njësi dhe Bashkia e Vorës ishin dy zonat në të cilat u zbatua numërimi elektronik i votës. Pavarësisht se rezultati duhet të dilte pak minuta pas përfundimit të votimit, Komisioneri Shtetëror i Zgjedhjeve, Ilirjan Celibashi, vendosi të shtyjë publikimin e këtij rezultati me kërkesë të opozitës.