Kandidati Byberi: Investimet e reja e kthejnë Tropojën në kryeqendrën turistike të veriut

Kandidati i PS-së për kryetar të bashkisë Tropojë, Rexh Byberi tha se dalin në këtë takim elektoral me një bilanc pozitiv arritjesh dhe punë konkrete.

“Tropoja në 5 vitet e fundit ka marrë një zhvillim të madh dhe kjo falë investimeve që kemi bërë, duke i dhënë shkëlqimin që meriton Tropoja turistike, fakt të cilin e dëshmon numri i lartë i vizitorëve dhe turistëve që vijnë në Tropojë”, u shpreh Byberi.

Ai tha se Tropoja ka ndryshuar në këto vite, por projektet dhe investimet e reja do ta kthejnë këtë qytet në kryeqendrën turistike të veriut të vendit, me ndikim në rritjen e ekonomisë dhe turizmit.

“Kemi dorëzuar në qeveri projekte që i japin zhvillimin e merituar Tropojës dhe jemi besimplotë se qeveria do të na mbështesë për këtë zhvillim. Projekti ‘Porta e Alpeve’, rruga Qafë-Prushit, dhe shumë projekte të tjera, janë investime që do të na mbështesë qeveria, për më shumë progres në Tropojën tonë turistike”, tha ai.