Kandidati i PD-së refuzon mandatin: Ka ardhur koha që ky kryeministër t’i lërë rrugën demokracisë

Përveç Myslim Murrizit i cili vendosi të mos i bindej vullnetit të ish-deputetëve të opozitës për të hequr dorë nga mandati i deputetit, asnjë nga kandidatët lushnjarë të listës shumëemërore të Partisë Demokratike, në listën e qarkut të Fierit nuk i pranon mandatet pasardhëse.

Kandidati i radhës i Partisë Demokratike, Ermal Sefa refuzon marrjen e mandatit të deputetit, duke sqaruar se e refuzon mandatin e deputetit, duke dëshmuar kështu kauzën e drejtë të opozitës së bashkuar përballë një kryeministri bajat e të dalë boje.

Përmes një postimi në faqen e tij zyrtare në rrjetin social “Facebook”, ku dhe publikon shkresën dërguar Komisionit Qendror të Zgjedhjeve, Sefa teksa rendit arsyet se pse heq dorë nga marrja e mandatit të deputetit, shprehet se ka ardhur koha që ky kryeministër t’i lërë rrugën demokracisë, duke dhënë dorëheqjen e duke i hapur udhën zgjedhjeve të lira e demokratike, të organizuara nga një qeveri e përgjegjshme.

Qëndrimi i kandidatit të PD-së

Së pari, e refuzoj sot mandatin e deputetit, duke dëshmuar kështu kauzën e drejtë të opozitës së bashkuar përballë një kryeministri bajat e të dalë boje (njësoj siç i ka dalë boja fasadave të rilindjes urbane, shëmti që ai na e shet çdo ditë si estetikë).

Së dyti, refuzoj këtë mandat për faktin se ishte ky kryeministër (Edi Rama) i cili as edhe një herë te vetme nuk e pa opozitën shqiptare në këtë parlament si partnere në emër të interesit publik.

Së treti, e refuzoj këtë mandat për të të dëshmuar se qe ky kryeministër, që në qefin e timonit vetëm për veten, kërkoi ta dominojë dhe ta shpërfill pandërprerë opozitën.

Së katërti, e refuzoj sot këtë mandat për të dëshmuar dritëshkurtësinë e këtij kryeministri, që në miopinë e tij nuk qe në gjendje ta durojë opozitën në funksion të integrimit të vendit.

Së fundi, por jo më pak e rëndësishmja, ky kryeministër na përballi në zgjedhjet e 2017-tës me bandat kriminale, bleu votat me lekët e krimit, e çdo ditë bën pazare me kriminelët duke vjedhur shqiptarët.

Konkluzion: – Ka ardhur koha që ky kryeministër t’i lërë rrugën demokracisë, duke dhënë dorëheqjen e duke i hapur udhën zgjedhjeve të lira e demokratike, të organizuara nga një qeveri e përgjegjshme

Oferta është në tavolinë, kjo është mundësia e çlirimit të vendit nga prangat e krimit dhe allishverishet e korrupsionit.

Dokumenti i KQZ

/ Koha Jonë