Një konflikt mes disa personave në Rrogozhinë është parandaluar të përshkallëzohej, ndërsa policia ka arrestuar dy të rinj dhe ka sekuestruar një kallashnikov së bashku me municion luftarak.
Në kuadër të operacionit “Prevent 2”, shërbimet e Komisariatit të Policisë Kavajë, në bashkëpunim me Stacionin e Policisë Rrogozhinë, arrestuan në flagrancë 26-vjeçarin A. I. dhe 21-vjeçarin O. T., të dy banues në Peqin.
Sipas policisë, 26-vjeçari akuzohet për “Mbajtja pa leje dhe prodhimi i armëve, armëve shpërthyese dhe municionit” dhe “Kanosja”, ndërsa 21-vjeçari për “Moskallëzimi i krimit”.
Ngjarja ndodhi rreth orës 01:00 të 13 shtatorit, pasi policia mori informacion se një 35-vjeçar po kanosej me armë zjarri për motive të dobëta. Menjëherë pas sinjalizimit, uniformat blu identifikuan banesën ku ndodheshin të dyshuarit dhe kryen kontroll në ambientet e saj.
Gjatë kontrollit u gjet një armë zjarri tip kallashnikov dhe municion luftarak, të cilat u sekuestruan si prova materiale.
Nga hetimet paraprake rezulton se A. I. kishte kanosur me vrasje 35-vjeçarin A. S., banues në Tiranë. Ky i fundit po shkonte në banesën e një 36-vjeçareje në Rrogozhinë, ku ndodheshin edhe dy të dyshuarit.
Ndërkohë, pas veprimeve procedurale dhe konsultimit me Prokurorin, 36-vjeçarja do të ndiqet penalisht në gjendje të lirë për “Moskallëzimi i krimit”. Sipas policisë, ajo nuk ndodhej në banesë në momentin kur nisi konflikti.
Arma dhe municionet e sekuestruara pritet t’i nënshtrohen ekspertizave të mëtejshme kriminalistike, ndërsa materialet e çështjes i janë referuar Prokurorisë së Durrësit për veprime të mëtejshme.