Kartmonedhat e reja në qarkullim, ja çfarë ndodh me të vjetrat

Më datë 30 shtator 2019, Banka e Shqipërisë hodhi në qarkullim dy nga kartëmonedhat e Serisë së Re, përkatësisht prerjet 200 lekë dhe 5000 lekë.  Futja në qarkullim e kartëmonedhave të reja bëhet nëpërmjet sistemit bankar shqiptar.

Bankat tregtare të cilat kanë nevojë për para, paraqiten pranë Bankës së Shqipërisë për furnizim dhe tërheqin kartëmonedha, sipas kërkesave të tyre. Bankat tregtare që janë furnizuar pranë Bankës së Shqipërisë kanë marrë kartëmonedhat e reja.

Bankat e tjera tregtare do t’i tërheqin këto kartëmonedha sipas nevojave që do të kenë për kartëmonedhat 200 lekë dhe 5000 lekë. Kjo do të thotë se futja në qarkullim e kartëmonedhave të reja është një proces i cili do të ndodhë gradualisht, ditë pas dite.

Kartëmonedhat ekzistuese të të gjitha prerjeve, do të vazhdojnë të qarkullojnë paralelisht me kartëmonedhat e reja. Ato do të vazhdojnë të kenë kurs ligjor dhe të shërbejnë si mjet pagese.