Kazinotë në qendër të Tiranës, Kadia: Varfëria i çon njerëzit drejt vesit

Vendimi i qeverisë ”Rama 2”, për t’i risjellë kazinotë në qendër të Tiranës, për Besart Kadian, drejtor ekzekutiv i Fondacionit për Liri Ekonomike, është një vendim i gabuar për faktin se zona e qendrës e ka formësuar tashmë profilin e saj si një zonë e populluar dhe e zhvilluar ekonomike.

Rikthimi i kazinove në këtë moment krize ekonomike dhe varfërie në vend, konsiderohet i gabuar prej tij edhe për faktin se mund ta rëndojë më tej plagën sociale të vesit për të cilin kryeministri vendosi 2 vjet më parë të mbyllte lojërat e fatit.

“Lojëra e fatit janë instrumente të shoqërive të varfra. Ky vendim mund ta çorientojë ekonominë shqiptare dhe vjen në një periudhë jo të përshtatshme. Vjen në një kohë me krizën ekonomike dhe e kombinuar me varfërinë do bëjë që njerëzit të lënë edhe paratë e fundit në lojërat e fatit”, thotë Kadia për ”euronews”.

Ai e cilësoi të padrejtë dhe të gabuar vendimin e qeverisë 2 vite më parë për të mbyllur papritur dhe në mënyrë të njëanshme lojërat e fatit. ”Mendoj se që nga fillimi ka qenë i gabuar vendimi i qeverisë për mbylljen e lojërave të fatit me një vendim të njëanshëm që çorientoi një industri të tërë. Lojërat e fatit janë përdorur edhe nga grupe kriminale për të pastruar paratë, por nuk mund të shkatërrohet një industri e tërë, e cila siç u mbyll në të ardhmen mund të rikthehet po aq fuqishëm”, shprehet më tej Kadia.