Kërkesa për votëbesim, reagon Abazoviç: Nuk do të mbijetojnë politikisht ata që filluan procedurën

Kryeministri i Malit të Zi, Dritan Abazoviç, ka reaguar ditën e sotme pas depozitimit të kërkesës nga ana e DPS-së në Kuvend, e cila kërkon votëbesimin e qeverisë.

Në një konferencë për mediat Abazoviç ka deklaruar se nuk e di nëse Qeveria do t’i mbijetojë 19 gushtit, por di se ata që filluan procedurën për votëbesimin nuk do të mbijetojë as politikisht.

“Një pjesë e njerëzve që e nisën procedurën dhe një pjesë e strukturave që e nisin atë procedurë, gjoja duke u fshehur pas Marrëveshjes Themelore, sigurisht që nuk do të mbijetojnë politikisht, qoftë kjo të realizohet më 19 gusht, në disa zgjedhje, në ato lokale në Podgorica, një pjesë e atyre strukturave sigurisht që nuk do të mbijetojë”, tha Abazoviç.

Qeveria e Dritan Abazoviç është akuzuar pasi firmosi marrëveshjen me Kishën Orthodokse Serbe.

Një ditë më parë Partia Demokratike e Socialistëve depozitoi kërkesën për votëbesimin e kryeministrit Dritan Abazoviç në parlamentin e Malit të Zi.