Kërkon shpalljen të pavlefshme të zgjedhjeve të 30 qershorit. Gjykata Kushtetuese pranon padinë e Voltana Ademit

Gjykata Kushtetuese ka pranuar padinë e kryetares së Bashkisë së Shkodrës, Volta Ademi, për shpallje të pavlefshme të procesit të 30 qershorit. Tre gjyqtarë kushtetues kanë vendosur në Dhomën e Këshillimit që ta kualifikojnë padinë e Voltana Ademit për shqyrtim në seancën plenare të kësaj gjykate. 52 ankime të tjera janë rrëzuar që në këtë fazë, ndërsa kjo padi së bashku me padinë e Presidentit për Teatrin Kombëtar e kanë kaluar këtë filtër.

Kjo është vetëm faza e parë e shqyrtimit të kërkesës së kryebashkiakes së Shkodrës, pasi gjykimi dhe vendimi do të kryhen kur Gjykata Kushtetuese të plotësohet me të paktën edhe 2 anëtarë të tjerë, shkruan ABC News.

Aktualisht Kushtetuesja ka vetëm 4 anëtarë dhe të vetmet vendime që mund të marrë janë ato për kalimin ose jo të çështjeve në seancë plenare. Por që të ketë një vendim përfundimtar për zgjedhjet e 30 qershorit gjykata duhet të ketë minimalisht 6 anëtarë, dhe parashikimi se kur kjo mund të ndodhë është i paqartë.

Padia e Voltana Ademit është bërë me 18 korrik dhe ka objekt mos njohjen e gjithë procesit të votimeve një partiake të 30 qershorit. Ankimimi i saj prej 23 faqesh, kishte si argument kryesor faktin se data 30 qershor ishte anuluar me dekret presidencial dhe se në 31 bashki të vendit kandidatët socialistë nuk kishin rivalë.