Kolegët e Sokol Fekës: Nuk e paragjykojmë pasi kishte borxhe dhe kredi

Kolegët e majorit Sokol Feka thonë se ata nuk e paragjykojnë atë për atë që ndodhi. Sipas tyre, ai ka qenë një pilot i shkëlqyer, por që ka pas probleme familjare, duke filluar nga borxhet dhe kreditë.

“Kemi punuar me Sokolin gjatë emergjencave të ndryshme. Ai ishte një pilot i shkëlqyer. Nuk e dinim se merrej me një aktivitetet të tillë, por ne nuk e paragjykojmë. Ai kishte nevojë për lekë, sepse kishte shumë probleme financiare. Jetonte me qera, kishte borxhe, kredi”, kanë thënë disa nga kolegët e tij në Repartin e Helikopterëve në Farkë.

“Edhe pse piloti kishte hapur një biznes pastrimi, kjo nuk e ndihmoi të dilte nga jetesa në kushte të vështira në një banesë me qera. Kjo histori duhet të shërbejë që pilotët të trajtohen më mirë ekonomikisht. Vetëm ai e di se përse e ka bërë një gjë të tillë, por besoj se hallet e kanë shtyrë ta bëjë diçka të tillë”, ka thënë një tjetër. Sipas tyre, Feka merrte vetëm 53 mijë lekë të reja rrogë.