Koncerti i Kanye West në Tiranë, Çakërri: Paratë do të kthehen! Dervishi: Nuk kanë zënë mend nga protesta

Financimi i koncertit të Kanye West nga buxheti i shtetit ka ndezur debatet. Deputetja socialiste Briseida Çakërri mbrojti vendimin e qeverisë, duke argumentuar se fondi prej 4 milionë eurosh i akorduar nga qeveria do të kthehet pesëfish në buxhetin e shtetit.

“Janë para të shqiptarëve dhe do të kthehen pesëfish. Ajo që ne presim më pas është 5-6 fish më e madhe sesa ajo që po jepet në këtë moment. Një kosto e ngjarjes dhe imazhit të vendit, na bën mirë ne në këtë moment. Biletat nuk po shiten vetëm, për shqiptarët, por po shiten edhe për të huajt dhe të gjitha janë të ardhura për buxhetin e shtetit. Nuk kishim arsye për t’i humbur për sa kohë nuk ishte një fond apo shpenzim i lartë ku 1.6 euro do paguanin shqiptarët për këtë gjë. Për këtë arsye u mor kjo masë në këtë moment”, tha ajo në A2 CNN.

Gazetari Lutfi Dervishi e cilësoi problem mungesën e koherencës dhe transparencës dhe theksoi se debati nuk lidhet me faktin nëse fondi do të gjenerojë apo jo të ardhura, por me deklaratat e mëparshme të qeverisë se nuk do të përdorej asnjë qindarkë nga buxheti i shtetit, çka sipas tij tregon se qeveria nuk ka zënë mend nga protesta dhe mesazhi i saj.