Një debat i fortë ka shpërthyer në seancën e fundit parlamentare, ku përveç çmimit të naftës është diskutuar edhe një lajm për organizimin e një koncerti të reperit ndërkombëtar Kanye West në Tiranë. Deputetja e Partisë së Lirisë, Erisa Xhixho, ka akuzuar qeverinë për keqmenaxhim të fondeve publike, duke e konsideruar të papranueshme, sipas saj, vendosjen e shpenzimeve të mëdha në një kohë krize ekonomike. Ajo kërkoi shpjegime për një fond prej 50 milionë eurosh, që pretendoi se do të përdoret për ndërtimin e një stadiumi të përkohshëm për këtë koncert.
“Keni alokuar 50 milionë euro për një koncert në Tiranë me stadium montim-çmontim? Në një situatë krize ekonomike, si mund të shpenzohen këto para për propagandë, ndërsa nuk ulet çmimi i naftës?”, u shpreh Xhixho në Kuvend.
Ministri i Financave, Petrit Malaj, i hodhi poshtë këto pretendime, duke i quajtur të pavërteta dhe pa bazë. Ai deklaroi se shteti nuk ka planifikuar asnjë financim për këtë aktivitet. ”Ku e keni dëgjuar këtë shifër? Është ‘fake news’. I gjithë buxheti i Ministrisë së Kulturës është 70 milionë euro. Shteti nuk do të investojë asnjë lek në këtë aktivitet”, tha Malaj, duke theksuar se fondet publike janë të miratuara dhe të destinuara për zëra të tjerë.
