Në Kongregacionin a Mbledhjen e nëntë të Përgjithshme të kardinalëve: kujtimi mirënjohës i Papa Françeskut, proceset e iniciuara prej tij dhe përgjegjësia për t’i vazhduar e mbrojtur ato. Por edhe detyra e dyfishtë e Kishës: të jetojë dhe dëshmojë unitetin brenda vetes dhe të promovojnë vëllazërinë në botë.
Në Romë deri më sot janë 131 kardinalë nga 133 që pritet të hyjnë në Konklavin e ardhshëm më 7 maj për të zgjedhur Papën e ri. Prej tyre, 127 sot ishin të pranishëm në Kongregacionin a Mbledhjen e nëntë të Përgjithshme, mbajtur paradite nga ora 9 deri në 12.30 në sallën e re të Sinodit, ku gjithsej morën pjesë 177 kardinalë. Këto janë përditësimet më të fundit të Matteo Brunit, drejtor i Zyrës së Shtypit të Selisë së Shenjtë.
Ai shpjegoi gjithashtu se puna e rinovimit në Casa Santa Marta për të akomoduar kardinalët po vazhdon me një ritëm intensiv dhe për këtë arsye do të përfundojë deri të hënën më 5 maj. Prandaj, kardinalët që marrin pjesë në Konklavin e ardhshëm do të mund të fillojnë të hyjnë në shtëpinë e Shën Martës duke filluar nga mbrëmja e së martës 6 maj, deri në mëngjesin e së mërkurës 7 maj, përpara Meshës “pro eligendo Pontificie” që është programuar për në orën 10.00 të 7 majit. Në mbledhjen e sotme u zgjodhën edhe kardinalët që do të mbështesin kardinalin Marx, koordinator i Këshillit të Ekonomisë, për ditët në vijim në Komisionin që ndihmon Kamerlengun e Kishës, kardinalin Kevin Farrell, në mbarështimin e punëve të zakonshme. Këta janë kardinalët Robert Francis Prevost dhe Marcello Semeraro.
Një Kishë që i sjell dritë botës
Në Kongregacionin e nëntë të sotëm pati 26 ndërhyrje që reflektuan mbi tema të ndryshme që kanë të bëjnë me jetën e Kishës. Zyra e Shtypit të Vatikanit njoftoi se kardinalët shpresojnë se Papa i ardhshëm do të jetë profetik dhe se Kisha nuk do të mbyllet në çenakul, por do të dalë dhe do t’i sjellë dritën e Ungjillit një bote që ka nevojë urgjente për shpresë. Në këtë kontekst, u diskutua edhe rreth Vitit Jubilar, që ka si temë “Shtegtarë të Shpresës”. Kardinalët diskutuan gjithashtu edhe se si Kisha duhet të jetojë në botë, jo e mbyllur në botën e saj duke rrezikuar të bëhet e parëndësishme. Kardinalët kujtuan më pas me mirënjohje veprën e Papa Françeskut, duke cituar shpesh nxitjen apostolike të botuar në vitin 2013, Evangelii gaudium, dhe duke nënvizuar proceset që kanë filluar, të cilat Papa i ardhshëm do të duhet t’i marrë në dorë. Ndër temat e tjera të përmendura, u diskutua detyra e dyfishtë e bashkimit në Kishë dhe vëllazërisë në botë, bashkëpunimi dhe solidariteti midis Kishave, roli i Kuries Romake në raport me Papën, shërbimi i Kishës dhe i Papës në favor të paqes, vlera e arsimit, dialogu dhe misioni ekumenik, sinodaliteti dhe kolegjialiteti.
Takimet e ardhshme
Zyra e Shtypit të Vatikanit njoftoi se kardinalët kanë vendosur të shtojnë një seancë të dytë të hënën e ardhshme dhe për këtë arsye do të takohen për Kongregacionet e Përgjithshme si paradite në orën 9 ashtu edhe në pasdite në orën 17. Për momentin, është planifikuar vetëm një seancë për të martën paradite, më 6 maj, por kardinalët mund të shtojnë edhe një tjetër në pasdite nëse është e nevojshme. Nuk është planifikuar asnjë Kongregacion për nesër, e diel, 4 maj Së fundi, Dekani i Kolegjit të Kardinalëve, Giovanni Battista Re, u kujtoi të pranishmëve se për muajin maj, kushtuar Virgjërës Mari, Bazilika e Shën Pjetrit organizon lutjen e Rruzares në Shesh çdo të shtunë në mbrëmje në orën 21:00.
R.SH. – Vatikan