Koordinatori i Shkodrës për pandeminë, Lamallari: Do ja dalim

Zv/ministri i Brendshëm, Besfort Lamallari, është caktuar si koordinator për qarkun e Shkodrës, në përballimin e situatës së pandemisë së Covid-19. Komandimi i Lamallarit erdhi pas shkarkimit të prefektit të Shkodrës, Çesk Millja, disa ditë më parë, pasi ministri i Brendshëm konstatoi neglizhencë në marrjen e masave që parandalonin grumbullimet masive, sidomos në tregje.

Këtë paradite, Lamallari, i shoqëruar nga Drejtori i Përgjithshëm i Policisë, Ardi Veliu dhe shefi i shtabit të Forcave të Armatosura, Bardhyl Kollçaku, kanë inspektuar tregjet.

Lamallari u ka kërkuar qytetarëve të Shkodrës bashkëpunim për kalimin me sukses të kësaj krize. Kreu i Policisë së Shtetit, Ardi Veliu deklaroi se qëllimi i masave nuk është ndëshkimi i qytetarëve shkodranë.

Shkodra është qyteti i dytë me numrin më të lartë të rasteve të konfirmuara me koronavirus, plot 70, duke mbetur vetëm pas Tiranës, me 221 raste.