Krasniqi: Mbrojtja nga dezinformimi sfidë, verifikimi i fakteve nuk duhet të prodhojë censurë

Në drejtimin e kryetarit Erion Braçe, Komisioni Posaçëm “Për të koordinuar dhe mbikëqyrur të gjitha veprimet institucionale për të luftuar dezinformimin dhe format e tjera të ndërhyrjes së huaj në proceset demokratike të vendit” zhvilloi një seancë dëgjimore me Komisionin Qendror të Zgjedhjeve (KQZ); Autoritetin e Komunikimeve Elektronike dhe Postare (AKEP); Autoritetin e Mediave Audiovizive (AMA).

Kryetarja e AMA-s, Armela Krasniqi në fjalën e saj e konsideroi mbrojtjen nga dezinformimi, si sfidë të institucionit që drejton. “Është para së gjithash sfidë profesionale pasi lidhet ngushtësisht me aftësinë e profesionistëve për verifikimin e burimeve pavarësisht presionit për të qenë i pari apo presionit për klikime së fundmi”, deklaroi Krasniqi.

“Është sfidë standardesh demokratike pasi verifikimi i fakteve, burimeve nuk duhet të prodhojë censurë” tha Krasniqi. Kryetarja e AMA-s theksoi vendosmërinë e institucionit që ajo drejton në luftën kundër dezinformimit, si një garantim i ekuilibrit nëpërmjet lirisë së shprehjes nga njëra anë dhe formimit profesional nga ana tjetër.