Këshilli i Imunitetit, kreu i SPAK-ut: Belinda Balluku rrezikon deri në 35 vite burg

Në mbledhjen e Këshillit të Mandateve që po zhvillohet në kryesinë e Kuvendit, prokurorët e SPAK kanë deklaruar se Belinda Balluku rrezikon deri në 35 vite burg.

Kreu i SPAK, Klodian Braho: Në situatën kur i kërkuar masa e parë ndaj znj. Balluku rrezikonte deri në 10 vite burg; sot që flasim situata e saj është rënduar, dhe me akuzat e prokurorisë në këtë moment znj. Balluku rrezikon deri në 35 vite burg. Të njëjtën vepër e ka kryer 9 herë. Secila vepër dënohet me 4 vite. Me bashkim dënimesh ky është marzhi i veprës.

Këshilli i Imunitetit u mblodh për herë të dytë për të shqyrtuar kërkesën, ndërsa vetë zv.kryeministrja nuk ishte e pranishme. Mbledhja e cila ka nisur prej orës 10:00, po zhvillohet me dyer të mbyllura me kërkesë të SPAK pasi çështja përbën sekret hetimor.

Partia Demokratike akuzoi mazhorancën se ka penguar drejtësinë duke e zvarritur kërkesën prej 2 muajsh, dhe kërkoi mbledhje me dyer të hapura. Por, kjo kërkesë u kundërshtua nga socialistët. Balluku është marrë e pandehur për shkelje të barazisë në tenderë për Tunelin e Llogarasë dhe në hetim edhe për 7 lotet e Unazës së Madhe.