Krimi sofistikohet. Filloi epoka e sulmeve me tritol, me dron!

Fillon edhe epoka e tritoleve me dron! Edhe këtë nuk e kishim dëgjuar, por po mësohemi edhe me këtë sajesë teknologjike, ku me sa mendohet do jenë pa ndalesë kjo metodë krimi e sofistikuar.

Shpërthimi i tritolit në Durrës dy ditë më parë, ka ndodhur në biznesin e deputetit të Partisë Socialiste Lefter Koka.

Policia e ka arrestuar autorin e dyshuar, Gentian Meta ditën e ngjarjes dhe tha se atij iu gjet pulti i dronit me të cilin hodhi tritolin mbi tarracën e një godine trekatëshe, objekt biznesi, kantinë pijesh në pronësi të Lefter Kokës.

Kujtojmë se ky është sulmi i dytë ndaj biznesit të Lefter Kokës, pasi një ditë para zgjedhjeve u qëllua me armë pranë biznesit të tij. Policia po heton nëse dy sulmet mbi biznesin e Kokës kanë lidhje me njëra-tjetrën, por që duket se duhet të kenë sepse koicidenca nuk duket e besueshme.

Në një njoftim për mediat policia bënte me dije në 9 qershor se:

Shërbimet e Komisariatit të Policisë Durrës, menjëherë pas njoftimit të marrë për shpërthimin e një sasie të vogël lënde eksplozive të hedhur mbi tarracën e një godine trekatëshe, objekt biznesi, në pronësi të shtetasit J. D., në lagjen nr. 14 Durrës, kanë organizuar punën dhe falë veprimeve të shpejta hetimore dhe profesionale, bënë të mundur identifikimin, kapjen dhe arrestimin e autorit të dyshuar, shtetasit: G. M., 44 vjeç, banues në Shijak.

Nga shpërthimi i lëndës eksplozive janë shkaktuar dëme të vogla materiale.

Në vijimësi të veprimeve hetimore u arrestua në flagrancë dhe shtetasi B. Z., 34 vjeç, banues në Shetaj, Durrës, menaxher i lokalit në pronësi të shtetasit G. M., pasi nga kontrolli i ushtruar në automjetin e tij, shërbimet e Policisë gjetën dhe sekuestruan në cilësinë e provës materiale një armë zjarri pistoletë, me një karikator me 7 fishekë luftarakë.

Gjithashtu në vijim të veprimeve u procedua penalisht edhe vëllai i autorit të dyshuar të ngjarjes, shtetasi A. M., 46 vjeç, banues në Shijak, pasi nga kontrolli i ushtruar në banesën e tij në Shijak iu gjet një sasi vere me logon e një subjekti tjetër, veprime këto që bien ndesh me vendimin e gjykatës.

Në përfundim të veprimeve procedurale, materialet iu referuan Prokurorisë pranë Gjykatës së Shkallës së Parë Durrës, në ngarkim të shtetasit G. M., për veprat penale “Shkatërrimi i pronës me eksploziv”, “Kanosja”, “Mbajtja pa leje e armëve dhe municionit”; në ngarkim të shtetasit B. Z., për veprën penale “Mbajtja pa leje e armëve dhe municionit “dhe në ngarkim të shtetasit A. M. për veprat penale “Shkelja e të drejtave të pronësisë industriale” dhe “Veprime në kundërshtim me vendimin e gjykatës”.