Kriza energjitike, Rama tregon se cila është përgjegjësia nr.1 e qeverisë shqiptare

Kryeministri Edi Rama tha se kriza e jashtëzakonshme energjitike që përballet i gjithë globi, do të vendoset në fund të 6-të mujorit parë të vitit 2022. Kreu i qeverisë theksoi se prioriteti i qeverisë së tij është që të mbrojë nga goditja e kësaj fatkeqësie të re shtresat më në nevojë, konsumatorët familjarë si dhe biznesin e vogël.

“Ekspertët mendojnë se pavarësisht implikimeve të mundshme sistemike, që kriza e jashtëzakonshme energjitike mund të ketë mbi të gjitha vendet, beteja kulmore do të zhvillohet dhe do të vendoset, deri në fund të gjashtëmujorit të parë të vitit të ardhshëm.

Përgjegjësia e detyra numër një e qeverisë shqiptare, është të mbrojë medoemos dhe sido e sado që të jetë e mundur, nga goditja e kësaj fatkeqësie të re, shtresat më në nevojë, konsumatorët familjarë, si edhe biznesin e vogël; fiks në këtë rend prioritetesh.

Asnjë frikë, asnjë pasiguri, vetëm vendosmëri, durim e besim, se më e mira do të bëhet dhe Shqipëria do të vazhdojë të synojë majën që i kemi vënë vetes qëllim, në rrugëtimin sfidues të kësaj dekade të re ku sapo kemi hyrë”.