Kroacia kthen mbrapsht ngarkesën me speca djegës ,AKU nis kontrolle në Divjakë

Një ngarkesë prej 8,216 kilogramësh speca djegës e eksportuar nga Shqipëria është kthyer mbrapsht nga autoritetet kroate, pas zbulimit të niveleve të larta të pesticideve në produkt. Ngarkesa dyshohet se është marrë nga zona e Cërrikut dhe u ndalua në doganë për shkak të përmbajtjes mbi normë të tre substancave të ndaluara: Flonicamid, Chlorfenapyr dhe Tebufenpyrad.

Pas këtij incidenti, Autoriteti Kombëtar i Ushqimit (AKU) ka ndërmarrë kontrolle të menjëhershme në pikën e grumbullimit në Divjakë, ku po verifikohen kushtet e magazinimit, dokumentacioni i produkteve dhe praktikat e përdorura në trajtimin e specave për eksport.
Sipas autoriteteve ushqimore të Bashkimit Europian, këto pesticide përbëjnë rrezik serioz për shëndetin e njeriut, duke ndikuar në sistemin nervor dhe duke shkaktuar efekte toksike në organizëm. Kjo ka ngritur shqetësime për sigurinë ushqimore dhe reputacionin e produkteve shqiptare në tregjet ndërkombëtare.

Shqipëria ka rritur ndjeshëm eksportet bujqësore drejt vendeve të BE-së, por raste të tilla theksojnë nevojën për kontrolle më rigoroze dhe mbështetje teknike për fermerët dhe eksportuesit, në mënyrë që të përmbushin standardet europiane.